A revista Tempos Novos denuncia que en Galicia hai "compravenda de información"
Tempos Novos, revista mensual de información e opinión para o debate, sostén que Alberto Núñez Feijóo instalou "o mesmo sistema de control" que lle deu a Fraga Iribarne "plácidas lexislaturas" á fronte da Xunta de Galicia. "Toda unha estratexia de doma e castración da que non souberon ou non quixeron librarse os empresarios da comunicación", segundo comenta o xornalista Luís Álvarez Pousa, conselleiro delegado da empresa editora de Tempos Novos, medio no que alude a "dopaxe mediática" coa que se presentou o candidato do PP ás tres convocatorias da última década.
"Ese perverso modelo de relación coas empresas privadas, e de maneira especialmente intensa coa que ten unha posición dominante no país, La Voz de Galicia, asentou sobre a compravenda de información o que, aparte de comportar altas doses de corrupción, é o que boicotea de maneira noxenta, tóxica, a función social e política da que se sirve a Constitución para garantir o dereito de e á información veraz e o pluralismo", escribe tamén Luís Álvarez Pousa, baixo o título Dopaxe mediática.
O xornalista de referencia de Tempos Novos fala da entrega "a fondo perdido" de cando menos 21 millóns de euros ("a cantidade que globaliza o calculado a partir das non sempre fáciles descobertas nas listaxes de convenios, contratos e publicidade institucional").
A súa vez, o profesor da Universidade de Vigo Albino Prada, membro do Foro Económico de Galicia, sostén nun artigo que tamén publicou a revista Tempos Novos que a radiografía económica dos últimos dez anos en Galicia (2009-2019) é negativa para dez dos doce indicadores analizados. Catro deles teñen a ver coa riqueza e o emprego, tres están relacionados co desemprego e outros tres coa competitividade (I+D e exportación), e só noutros dous apréciase un pírrico avance. @mundiario
