Buscar

A Xunta sorprende ao apoiar ás eólicas fronte ao Tribunal Superior de Xustiza de Galicia

O Goberno galego recorrerá porque entende que un parque paralizado tramitábase "conforme a dereito" pero tivo que deter as obras do parque eólico de O Iribio tralo varapalo xudicial. O colectivo que loitou por esta decisión alerta de que a empresa continuaba estes días traballando nas obras.

A Xunta sorprende ao apoiar ás eólicas fronte ao Tribunal Superior de Xustiza de Galicia
Tribunal Superior de Xustiza de Galicia.
Tribunal Superior de Xustiza de Galicia.

Firma

Ramón Varela Díaz

Ramón Varela Díaz

El autor, RAMÓN VARELA DÍAZ, es colaborador de MUNDIARIO. Es catedrático de Biología y Geología, y doctor en Biología. Fue presidente de la asociación ecologista Adega. @mundiario

Nova controversia política en Galicia arredor das eólicas. O presidente da Xunta, Alberto Núñez Feijóo, anunciaba o xoves 24 de outubro aos medios de comunicación  que vai recorrer o fallo da sala do contencioso administrativo nº 3 do Tribunal Superior de Xustiza de Galicia (TSXG) que vén de atender un recurso presentado pola plataforma Salvemos o Iribio (formada por máis de 25 asociacións  e da que fai parte Adega). O TSXG suspende provisionalmente o acordo do Consello da Xunta do 27/06/2019 polo que se aprobaba o  proxecto de Fergo Galicia Vento para construir un parque eólico  de 8 aeroxeradores de 152 m de alto e 136 m de rotor na Serra do Iribio, entre Samos e Triacastela, nunha zona protexida de Rede Natura 2000 e próxima ao Camiño de Santiago.

O TSXG suspende a executividade deste acordo e das súas disposicións normativas “mentres tanto non se actualice a DIA –Declaración de Impacto Ambiental–” realizada fai 14 anos –ano 2005– e se xustifique a prevalencia do uso industrial sobre valores ambientais, paisaxísticos, forestais e culturais. 

A Serra do Iribio forma parte  dos espazos naturais protexidos  de Ancares-Courel e está declarada ZEPVN e ZEC (Zona de Especial Protección dos  Valores Naturais e Zona de Especial Conservación ). No ano 2005 permitíase construír parques eólicos en zonas protexidas e xa no 2009 o 39% da potencia eólica estaba instalada e provocando impactos nestes lugares, pero a presión social obrigou a cambiar a normativa e na actualidade  prohíbese instalar novos parques eólicos en zonas da Rede Natura.

Agora son os tribunais os que obrigan ás administracións públicas a cumprir co seu deber de preservar os espazos naturais protexidos e defender os intereses colectivos fronte os intereses privados dunha empresa eléctrica  que só busca o rédito económico. A pesar de que durante 5 meses se presentaron multitude de denuncias ante  os concellos de Samos e Triacastela e ante a Dirección Xeral de Enerxía e Minas contra estas obras, estas continuaron apuradamente e puxeron en perigo ( cando non destruíndo xa) a preservación dos valores naturais, culturais, paisaxísticos e ambientais que ten esta serra.

Ante as criticas e denuncias presentadas polo impacto dos parques eólicos o comportamento da Xunta é sempre o mesmo, posicionarse ao lado das empresas eléctricas como sucedeu recentemente con Naturgy no parque eólico Mouriños en Zas-Bergantiños, ou na Serra de Monciro en Castroverde-Pol, por non citar xa os parques de  Coristanco-Santa Comba-Carballo-Tordoia da empresa Greenalia Power. Agora vai máis alá, vai ate o fondo e apoia a empresa Fergo Galicia Vento  fronte ao Tribunal Superior de Xustiza de Galiza. Todo para implantar un parque en Rede Natural 2000. @mundiario