A planta de pretratamento de aceites de buques na Coruña esixe unha ubicación racional
En Oza estará situada a menos de 500 metros da praia e dun banco marisqueiro lindeiro e igualmente a menos de 500 metros da praia de Santa Cristina e da bocana da Ría do Burgo, onde tamén existen e se explotan bancos marisqueiros.
A Xunta de Galiza vén de conceder a Autorización Ambiental Integrada á instalación dunha planta de pretratamento de aceites de buques na dársena de Oza, na cidade da Coruña. Un proxecto que conta coa oposición da veciñanza dos barrios da Gaiteira e Os Castros.
Non negamos que unha planta de recepción e tratamento de aceites procedentes de buques sexa necesaria, pero a todas luces a súa ubicación en Oza non é a idónea. E explicarei por que.
A planta estará situada a menos de 500 metros da praia de Oza e dun banco marisqueiro lindeiro e igualmente a menos de 500 metros da praia de Santa Cristina e da bocana da Ría do Burgo, onde tamén existen e se explotan bancos marisqueiros.
Non ten moito sentido que –unha vez que está en marcha a tan demandada rexeneración da Ría do Burgo, que debe servir para restaurar os valores ambientais e a capacidade produtiva da Ría– esta actuación se vexa ameazada pola instalación desta planta.
Por moitas medidas de seguridade que se adopten, sempre poden producirse incidentes e, de feito, nesta zona xa se teñen producido verteduras.
E realmente tampouco parece moi racional a súa instalación nas proximidades dunha praia con bandeira azul nin que a Xunta de Galiza teña na construción dunha pasarela entre Oza e Santa Cristina a súa proposta estrela e, ao mesmo tempo, autorice a instalación nesa zona dunha planta de tratamento de residuos procedentes dos barcos.
Máxime cando estamos a falar duns barrios, A Gaiteira e Os Castros, castigados durante anos por soportar as actividades máis molestas do porto e as de maior impacto ambiental, caso das descargas de carbón, ou as actividades máis perigosas, como é o caso do tráfico petroleiro.
Por iso, cando se está a levar a cabo o traslado destas actividades ao Porto Exterior de Punta Langosteira, non entendemos as razón que levan a ubicar estas instalacións en Oza.
Por iso expresamos o noso apoio ás demandas da veciñanza destes barrios e demandamos da Autoridade Portuaria que busque unha alternativa distinta, máis racional, máis sustentábel. @mundiario
