Buscar

A ministra de Facenda e o presidente da Xunta, na presentación do Anuario 2019 do Foro Económico de Galicia

Na súa cuarta edición, coeditada polo xornalista José Luis Gómez e o profesor Albino Prada, o Anuario 2019 da cabida ás aportacións de profesores das universidades da Coruña, Santiago e Vigo. 2018 foi un bo ano para a economía galega e 2019 desenvólvese como un exercicio de maior incerteza e máis deberes, segundo Pérez Nieto e Santiago Lago.

A ministra de Facenda e o presidente da Xunta, na presentación do Anuario 2019 do Foro Económico de Galicia
María Jesús Montero e Alberto Núñez Feijóo. / Mundiario
María Jesús Montero e Alberto Núñez Feijóo. / Mundiario

Redacción

Análisis de @mundiario

Chega o Anuario 2019 do Foro Económico de Galicia, cuxo presidente, Emilio Pérez Nieto, e o seu director, Santiago Lago Peñas, intervirán xunto a ministra de Facenda, María Jesús Montero, o presidente da Xunta de Galicia, Alberto Núñez Feijóo, o delegado do Goberno en Galicia, Javier Losada, e a alcaldesa de A Coruña, Inés Rey, na presentación en A Coruña do Anuario 2019, que terá lugar este martes, 30 de xullo de 2019, as 12 horas, na sede de Afundación Obra Social Abanca (Cantón Grande, 8).

Na súa cuarta edición, o Anuario do Foro Económico de Galicia foi editado polo xornalista José Luis Gómez e o profesor Albino Prada. Aborda os grandes asuntos económicos de Galicia e o seu entorno e da cabida ás aportacións de profesores das universidades de A Coruña, Santiago e Vigo.

Xa que logo, profesores das tres universidades de Galicia e da Universidade do Minho en Portugal volven configurar coas súas achegas o Anuario do Foro Económico de Galicia na súa edición de 2019, que tamén incorpora unha análise do economista e empresario Emilio Pérez Nieto, asinado de xeito conxunto co catedrático da Universidade de Vigo Santiago Lago Peñas.

Nesta cuarta edición do Anuario, repleta de rutas e argumentos, prima a análise, non exenta de opinións con criterio propio. “Estamos, sen dúbida, ante un cualificado panel de académicos librepensadores”, subliña o xornalista José Luis Gómez na presentación desta obra coral.

Este Anuario 2019 chega á pechadura dun exercicio 2018 no que a economía española medrou  un 2,6%, o menor incremento en catro anos: 3,6% en 2015, 3,2% en 2016, 3,0% en 2017 e o xa mencionado 2,6% en 2018. En Galicia, o PIB pechou 2018 cun crecemento medio anual do 2,8%, catro décimas menos que no ano precedente, segundo avanzou o Foro Económico de Galicia, que previamente xa demostrara a súa capacidade predictiva. Como sosteñen Emilio Pérez Nieto e Santiago Lago Peñas, 2018 foi “un bo ano para a economía galega”, e 2019 desenvólvese como “un exercicio de maior incerteza e máis deberes pendentes”.

Son tamén autores do Anuario Fernando González Laxe, catedrático da Universidade da Coruña e directivo do Foro Económico de Galicia; Xosé Carlos Arias, catedrático da Universidade de Vigo; María Cadaval, profesora da Universidade de Santiago; Francisco Carballo-Cruz, profesor da Universidade do Minho; Albino Prada, membro de ECOBAS e coeditor do Anuario 2019 do Foro Económico de Galicia; Xoán López Facal, economista; Luis A. Otero, profesor da Universidade de Santiago, que escribe xunto a Pablo Durán e Luis Ignacio Rodríguez; Manuel Varela Lafuente, catedrático da Universidade de Vigo; Patricio Sánchez Fernández, profesor da Universidade de Vigo e subdirector do Foro Económico de Galicia; Manuel Lago, profesor da Universidade de A Coruña; Isabel Novo Cortí, profesora da Universidade da Coruña; Edelmiro López Iglesias, profesor da Universidade de Santiago; María Xosé Vázquez, profesora da Universidade de Vigo; José Manuel Sánchez Santos, profesor da Universidade da Coruña; María L. Loureiro, catedrática da Universidade de Santiago, e José Luis Gómez, xornalista, editor de MUNDIARIO, e coeditor do Anuario 2019, obra que contén artigos –amplamente documentados– que reflexan unha visión profunda e rigorosa das súas análises e propostas.

O Foro Económico de Galicia é unha plataforma de transferencia de coñecemento das universidades e empresas galegas á sociedade. Está integrada por profesores das tres universidades galegas, empresarios e directivos de referencia e xornalistas especializados en divulgación económica.  Un total de máis de 60 persoas referentes para a análise e confección de propostas para a economía galega. @mundiario