As exportacións galegas medraron máis do dobre que as españolas
O sector da automoción consolida na primeira metade do ano a boa tendencia xa iniciada no volume exportado no primeiro trimestre. O BAEXGA avalía o pulso competitivo da economía galega tendo en conta as vendas ao exterior e o número de empresas que as realizan.
O Barómetro Exportador de Galicia do Foro Económico de Galicia (BAEXGA) para o primeiro semestre do ano (de xaneiro a xuño de 2018) recolle un desempeño exportador moi favorable.
Nomeadamente, no primeira metade deste ano as exportacións de Galicia medraron máis do dobre que as do conxunto de España, e moi por riba da media europea. É de destacar o intenso dinamismo das exportacións cara o resto da UE pois supoñen cerca do oitenta por cento das nosas vendas ó exterior.
No que atinxe o número de exportadores seguimos a ter un peor comportamento que o conxunto de España. Xa que logo segue sendo reducida, e diminuíndo, a nosa cota no total de empresas exportadoras españolas.
O sector da confección é o mellor expoñente do noso éxito exportador, sobre todo en volume exportado pero tamén en exportadores. Así cara os decisivos mercados europeos máis que triplicamos o crecemento exportador medio español do sector. O sector da automoción consolida na primeira metade do ano a boa tendencia xa iniciada no volume exportado no primeiro trimestre. Singularmente cara os mercados da UE (destacando Italia, Reino Unido ou Portugal). Pero non conseguimos ampliar a base de empresas exportadoras do sector, cousa que si sucede no conxunto de España.
O BAEXGA avalía o pulso competitivo da economía galega tendo en conta as vendas ao exterior e o número de empresas que as realizan. O BAEXGA incorpora ao mesmo tempo a evolución no longo prazo (nos últimos dez anos) tanto das exportacións como das empresas exportadoras. O Foro Económico de Galicia é unha plataforma de transferencia de coñecemento das universidades e empresas galegas á sociedade. Está integrada por máis de 60 profesores e investigadores das tres universidades galegas, empresarios e directivos e xornalistas especializados en divulgación económica. @galiciamundiari