A economía galega estabiliza o seu crecemento no comezo do ano
O Indicador Abanca - Foro de Conxuntura Económica de Galicia rexistrou no mes de xaneiro un incremento interanual do +1,2%: valor que coincide co do mes de decembro. Esta repetición do valor, tras seis meses consecutivos á baixa, racha a tendencia da actividade económica iniciada no verán cando acadara unha cota máxima do +3,2%.
Os datos de comezo de ano confirman a contención da desaceleración da economía galega, unha vez recuperado en 2022 o nivel prepandémico. Ademais os datos de decembro permitiron evitar a temida recesión que se viña anunciando. Porén, na comparación cos datos do conxunto do Estado persiste o desacople nos seus ritmos de crecemento, amosando España un mellor comportamento que Galicia.
O dato do primeiro mes serve para anticipar cal será o comportamento ao longo do primeiro trimestre ano. O inicio de 2023 non permite ser moi optimistas ao estar marcado por un contexto cheo de intercezas que afecta á confianza dos consumidores, á evolución dun sector chave como o industrial e, máis recentemente, aos mercados financeiros.
No que atinxe á evolución individual das variables recollidas no Indicador, destacan as variables turísticas. En particular, cómpre destacar o comportamento do transporte de pasaxeiros que reflicte un comportamento extraordinario (cun incremento interanual superior ao 40%), o que vén reforzar a boa campaña de Nadal do sector turístico galego.
En sentido contrario, a matriculación de turismos segue a retroceder, así como o consumo de gasolina e gasóleo. Ambos sofren descensos superiores ao 10% en termos interanuais no mes de xaneiro, o que da idea das dificultades actuais do sector do automóbil.
XII Reunión Anual do Foro Económico de Galicia
O 13 e o 14 de abril de 2023 celebraráse no Parador Costa da Morte de Muxía a XII Reunión Anual do Foro Económico de Galicia.
O Foro Económico de Galicia reúne na súa duodécima reunión anual a expertos académicos, directivos das grandes empresas de Galicia e líderes de opinión, en dúas xornadas de reflexión e debate sobre os grandes temas que marcan o paso da sociedade galega. A reunión celebrarase nas instalacións do Parador de Muxía.
Xoves 13 de abril.- Na primeira xornada, o xoves 13 de abril, a profesora da USC, María Bastida presentará o informe “O impacto da Intelixencia Artificial en Galicia”. Este traballo será comentado por tres expertos na materia: Senén Barro, da USC, Antonio del Corral, de CINFO, e Amparo Alonso, da UDC. A mesa estará moderada polo xornalista Mario Baramendi.
Tamén na xornada do xoves, os expertos Emilio Bruquetas, de Reganosa, e Arturo Gonzalo, de Enagas, presentarán o documento “Transición Enerxética” que será comentado por Alberto Suárez Fontenla, de Naturgy, e María Loureiro, da USC. Esta mesa será moderada por Lara Graña.
Venres 14 de abril.- A segunda xornada de traballo, o venres 14 de abril, arrincará cun debate baixo o título: Ou Galego como factor diferencial e contará cos relatores: Xosé Luís Barreiro, da USC, Francisco Darío Villanueva, da USC, José María Fonseca, de Adegas Terras Gauda, e Ramón Villares, da USC. Este debate será moderado por Fernanda Tabarés.
Para pechar a XII edición da Reunión Anual do Foro Económico de Galicia terá lugar un coloquio presentado por Unai Xordo, de CC OO, e moderado por Antón Costas, do CES España. @mundiario
