Pagos ilegais do Estado as centrais térmicas: Bruxelas mira para outro lado
Resulta preocupante pensar que as maiores responsables do efecto invernadoiro, como son as centrais térmicas de carbón, seguirán emitindo gases e partículas contaminantes e ademáis serán subvencionadas.
A Comisión Europea anunciou en novembro do 2017 unha investigación aberta e “pormenoriza” para determinar si o “incentivo medioambiental” dado polo Estado Español as centrais térmicas de carbón se axustaba as normas sobre axudas estatais da UE, investigación que trataría de esclarecer si en realidade estas subvencións a fondo perdido eran “ilegais”. España non se molestara en notificalas a Comisión para a sua avaliación con arranxo as normas sobre axudas estatais da UE.
O problema procedía do ano 2007, cando o Goberno Español decidiu que as centrais térmicas de carbón tiñan dereito a recibir axudas públicas de 8.750 euros por megawatio e ano durante un período de dez años para a instalación de novos filtros de óxido de xofre e diminuír así a contaminación que xera serios problemas na saúde (respiratorios, cardíacos, cerebrais...) e nos ecosistemas (“choiva ácida”). Un total de catorce centrais térmicas de carbón do Estado entre elas As Pontes (Endesa ) e Meirama (Gas Natural -Fenosa) acolleranse a este réxime de subvencións a fondo perdido. Nos últimos dez anos as térmicas en conxunto recibiron 440 millóns de euros, Endesa recibiu case a metade desta cantidade grazas a Central Térmica de As Pontes, a de maior potencia e producción do Estado.
Na UE a Comisaria responsable da política da Competencia declarara en novembro do 2017: ”Creemos actualmente que non se incentivou as centrais de carbón para que reduciran as prexudiciais emisións de óxido de xofre, pois xa estaban obrigadas a facelo en virtude do Dereito da UE en materia de medio ambiente. Polo tanto, tememos que o apoio dado a esas centrais de carbón deulles unha vantaxe competitiva desleal respecto doutras formas de produción de electricidade” . Por outra parte os Estados membros non poden conceder axudas estatais as empresas para que cumpran as normas obrigatorias da UE en materia de medio ambiente pois estarían atentando contra o principio de "quen contamina, paga".
Cando parecía que en Bruxelas estaban en cuestión as axudas encubertas dos Estados as centrais térmicas de carbón, e se “ investigaba” a ilegalidade de algunhas, en decembro do 2017 o Consello de Ministros da Enerxía da UE acorda conceder unha prórroga ao carbón e as centrais térmicas ate o ano 2030 , aceptando claramente que podan ter subvencións – pagos por capacidade- . Así mesmo acepta que en cada un dos Estados membros so se reduza ao 27% a cota de consumo enerxético procedente de enerxías renovables cando a Comisión xa tiña previsto alcanzar o 30% no 2030 .
Resulta preocupante pensar que as maiores responsables do efecto invernadoiro, como son as centrais térmicas de carbón, seguirán emitindo gases e partículas contaminantes (As Pontes e Meirama emiten o 31,7% de todas as emisións de Galicia de gases de efecto invernadoiro) e ademáis serán subvencionadas xenerosamente polo Estado con fondos públicos, axudas que se están incluíndo no prezo da enerxía e que xa figuran camufladas no recibo da luz.
Non importa que o seu funcionamento “normal” teña graves repercusións na saúde, que aumente a morbilidade e mortaldade. Non importa a problemática que ocasionan na saúde, tampouco o impacto local ou global: “efecto invernadoiro”, “choiva ácida” ou “destrución da capa de ozono”. A economía manda e a industria eléctrica está a cabeza.
A Comisión parece que o único que lle importa é un problema de transparencia e contabilidade: advirte de que "as axudas que se apliquen en adiante requirirán reformas previas no mercado. É dicir, haberá que xustificar moito máis a necesidade de habilitalas”. Despois de meses de silencio e as novas decisións do Consello de Ministros de Enerxía da UE, ¿que podemos esperar das “investigacións abertas” e do Parlamento Europeo?. Quen manda, manda. @mundiario